Хөдөлмөрийн баатар, ардын жүжигчин, Зууны манлай дуурийн дуучин Цэвэгжавын Пүрэвдорж марканд мөнхөрлөө.

Дуурийн урлагт үнэтэй хувь нэмэр оруулж, “Монголын дуурийн хаан” сэнтийг эзэлсэн Ц.Пүрэвдоржийн үйлс бүтээл, туурвилыг олон нийтэд түгээн дэлгэрүүлэх, хойш үедээ таниулах зорилгоор “Зууны манлай дуурийн дуучин Цэвэгжавын ПҮРЭВДОРЖ” сэдэвт блок маркийг шуудангийн гүйлгээнд гаргасан байна. Блок маркт 1964 онд Москвагийн их театрын тайзнаа Ази тивээс анх дуулсан П.И.Чайковский “Евгений Онегин” дуурийн Гремин, чимэглэл хэсэгт “Фауст” жүжгийн Мефистофель, С.Гончигсумлаа “Үнэн” дуурийн ноён, Ц.Нацагдорж “Үүлэн заяа” дуурийн Хоролдой тэргүүн ноён, Дуурь бүжгийн эрдмийн театрын тайз, лого зэргийг дүрслэн оруулсан байна.

Маркийг бүтээхэд Улсын дуурь бүжгийн эрдмийн театр, “Ц.Пүрэвдорж сан” ТББ, түүний үр, хүүхдүүд зөвлөгөө өгч, зураг материалаар ханган ажилласан байна.

Хөдөлмөрийн баатар, ардын жүжигчин, Зууны манлай дуурийн дуучин Ц.Пүрэвдорж 1929 онд Хэнтий аймгийн Дадал сумын Сэрүүн галтай гэдэг газар төржээ.

Тэрээр 1947 оноос Монголын театрын урлагт найрал дууны жүжигчнээс замналаа эхлүүлж, 1955-1960 онд ЗХУ-ын Свердловск хотын Уралын хөгжмийн дээд сургуульд суралцан дуурийн дуучны мэргэжил эзэмшсэн.

1960-1990 онд Дуурь бүжгийн эрдмийн театрын гоцлол дуучнаар ажилласан бөгөөд Дэлхийн залуучууд оюутны III, IV, V их наадам, гадаадын 20 гаруй орны дуурийн театрын тайзнаа уригдан тоглож, өөрийн орны болон дэлхийн сонгодог бүтээлээс 2570 гаруй удаа тоглосон байна. 

Мөн тэрээр 1964 оноос Дуурь бүжгийн эрдмийн театрын дэргэдэх дуулаачийн студи, 1990 оноос Соёл урлагийн их сургуулийн профессор багшаар ажиллаж залгамж үеийг бэлтгэхэд өөрийн авьяас билэг, эрдэм чадлаа зориулсан. Мөн 1966-1998 онд П.И.Чайковскийн нэрэмжит олон улсын уралдааны хүндэт шүүгчээр тасралтгүй найман удаа ажилласан билээ.

Маркийн танилцуулга

Сэдвийн нэр: Зууны манлай дуурийн дуучин Ц.Пүрэвдорж

Маркийн нэр төрөл: Нэг блок
Сэдвийн дугаар: 1134 /4348/
Гүйлгээнд гарсан анхны өдөр: 2023.10.14
Нүүрний үнэ: 3000 төгрөг
Хэвлэгдсэн тоо: 11000 ширхэг
Маркийн хэмжээ: 30х40 мм
Блокийн хэмжээ: 95х95 мм
Хэвлэлийн арга: Офсет 4 өнгө
Анхны өдрийн дугтуйны үнэ: 8000₮
Анхны өдрийн дугтуйны тоо: 1111 ширхэг
Маркийн зураач: Б.Баярхүү