Эрүүл мэндийн байгууллагуудаас өнөөдөр томуу, томуу төст өвчний нөхцөл байдал, урьдчилан сэргийлэх арга хэмжээний талаар дараах зөвлөмж, мэдээллийг өгч байна.
Өвчлөл өндөр байгаатай холбоотойгоор иргэд өрхийн эмнэлтээ ажлын өдөр 20:00 цаг хүртэл, ням гаригт 10:00-15:00 цагийн хооронд хандах боломжтой болсныг Эрүүл мэндийн яамнаас өмнө мэдээлсэн. Иймд эцэг эхчүүд эмнэлгийн яаралтай хүлээн авах дээр хүүхдээ дагуулж ирэх, 103 дуудахаасаа илүү ойр байгаа буюу ачаалал багатай өрхийн болон дүүргийн эрүүл мэндийн төвд хандахыг эрүүл мэндийн байгууллагынхан зөвлөв.
Эх хүүхдийн эрүүл мэндийн үндэсний төвийн зөвлөх баг жилийн томуугийн өвчлөлийн онцлог болон түүнээс урьдчилан сэргийлэх, эцэг эх, асран хамгаалагчид юуг анхаарах ёстой талаар дараах мэдээллийг танилцуулж байна. Энэ удаагийн томуугийн эхэлж байгаа байдал, эмнэлзүйн ажиглалтаас харахад нярай хүүхдүүд хатгалгаагаар хүндрэх байдал түгээмэл байна. Иймд нярай хүүхдээ өрхийн эмчдээ үзүүлээд давтан хоёр хоноод эргэж үзүүл гэсэн тохиолдол заавал эргэж хандах шаардлагатай гэв.
Нярайн аминд аюултай шинж тэмдгүүд:
- Өндөр халуурах
- Бөөлжих
- Хөхөндөө дургүй болох
- Унтаарах
Дээрх шинжүүдийг анзааралгүй өнгөрөөж болохгүй, эмнэлэгт цаг алдалгүй хандахыг зөвлөв. Мөн хүүхдийн дархлаа их онцлогтой учраас сайн унтуулж, хооллон хэт дааруулж, халууцуулахгүй байх зөвлөмжийг дагах шаардлагатай. Мөн танай хүүхэд ханиадны шинж чанартай бол цэцэрлэг, сургуульд нь явуулахгүйгээр гэрт нь эмчилгээг нь хийж дааруулахгүй, сайн хооллож амраахыг эцэг эхчүүдэд зөвлөж байна.
