Өнгөрсөн пүрэв гаригт 5,998 тонн жинтэй ОХУ-ын Сигранд ачааны хөлөг онгоц Бусан хотын боомтод хэд хэдэн осол гаргажээ.

Уг хөлөг Владивосток хот руу хөдөлж байсан ба зогсоолоос хөдлөхдөө тэнд зогсож байсан завийг мөргөж, цааш аялахдаа буруу чиглэлд явж, автозамын томоохон гүүрийг мөргөж гэмтээсэн байна. 

Осол гаргасныхаа дараа хөлөг задгай далай руу зугтахыг оролдсон байна. Харин Өмнөд Солонгосын эргийн хамгаалалтынхан хөлгийг зогсоож чадсан байна.

Цагдаа нар хөлгийн ахмадыг баривчлаад түүний цусан дахь спиртийн хэмжээ 0.086 хувь байгааг тогтоосон байна. Өмнөд Солонгосын далайн тээврийн хуулинд зааснаар таван тонноос дээш жинтэй хөлгийг жолоодож байгаа хүний цусан дахь спиртийн түвшин 0.03 хувиас илүү байвал гурав хүртэл жил шоронд хорих, эсвэл 30 сая хүртэл воны торгууль оноох шийтгэлтэй байдаг гэнэ.

Ослын дараа тус хотын Гванган гүүрний доод хэсэгт таван метр орчим өргөнтэй нүх гарсан байна.