АНУ-ын Ерөнхийлөгч Дональд Трамп байнгын эзэмшлийн маргаантай байдаг Голаны өндөрлөгийг Израилийн нутаг мөн гэдгийг хүлээн зөвшөөрсөн тунхаг бичигт даваа гаригт гарын үсэг зурлаа.
Энэхүү бүс нутгийг 1967 онд болсон зургаан өдрийн дайны төгсгөлд Израйлийн арми Сири улсаас булааж авч байсан аж.
Израилийн Ерөнхий сайд Биньямин Нетаньяху, АНУ-ын Ерөнхийлөгч Дональд Трамп нар баримт бичгийг баталгаажуулж гарын үсгээ зуржээ. Уг арга Цагаан ордонд болсон бөгөөд хоёр орны удирдагч нарын сэтгүүлчдэд хийсэн хамтарсан мэдэгдэл Америкийн телевизийн мэдээллийн сувгууд шууд дамжуулжээ.
АНУ-ын Ерөнхийлөгч Дональд Трамп "Израил улс батлан хамгаалахын салбарт өдөр бүр томоохон сорилтуудтай тулгарч байна. Тиймээс тус улсын өөрийгөө хамгаалах чадварыг бэхжүүлэхийн тулд өнөөдөр би түүхэн арга хэмжээг авч байна” гэжээ.
Уг түүхэн шийдвэрт Израилийн Ерөнхий сайд талархаж буйгаа илэрхийлээд "Голаны өндөрлөгийг Израил улсын нутаг мөн гэдгийг хүлээн зөвшөөрсөн таны шийдвэр бол түүхэн үйл явдал юм. Энэ шийдвэр шударга ёсонд нийцсэн үйл явдал билээ. Израил улс Голаны өндөрлөгийг шударга дайн явуулсны дүнд авсан, энэ бол өөрийгөө хамгаалах дайн байсан” гэж хариу хэлжээ.
Израилийн Ерөнхий сайдын хэлснээр, Иран улс Израилд цохилт өгөхийн тулд Сирид баазуудаа байгуулахыг оролдож байгаа энэ үед тунхаг бичигт гарын үсэг зурсан нь чухал ач холбогдолтой аж.
Харин энэхүү шийдвэрийн дараа Сири улсын засгийн газар мэдэгдэл гаргаж, Трампын алхмыг “тусгаар улсын газар нутгийн бүрэн бүтэн байдалд бүдүүлгээр халдсан хэрэг” гэж шүүмжилжээ.
