Японы Цагдаагийн газар Токиогийн хэд хэдэн дүүрэг, тэр дундаа эзэн хааны ордноос холгүйхэн дрон нисгэсэн хууль бус үйлдлийг шалгаж эхэллээ гэж “NHK" теле суваг мэдээлжээ.
Япон улсад хүн ам шигүү суурьшсан дүүрэгт болон төрийн чухал объект дээгүүр тусгай зөвшөөрөлгүйгээр дрон нисгэхийг хориглодог. Гэтэл эзэн хааны ордон байдаг Тиёда дүүрэг, түүнчлэн Минато, Шинжүкү зэрэг төвийн дүүрэгт үдшийн бүрэнхийд анивчсан гэрэлтэй дронууд нисч байгаа нь харагджээ. Дронууд хоёр цаг гаруйн хугацаанд ниссэн байна.
Цагдаагийн байгууллагаас дрон нисгэсэн сэжигтэй этгээдүүд болон автомашиныг хайж эхэлжээ. Түүнчлэн эдгээр хэсэгт дрон унасан эсэхийг шалгаж байна.
Өнгөрөгч 2015 онд Токио дахь Японы Ерөнхий сайдын ордны дээвэр дээрээс камертай дрон олдсон юм. Энэ дрон дээр сулавтар радио идэвхт бодистой хуванцар бөмбөлөг бэхэлсэн байжээ. Энэ явдлаас болж Японы засаг захиргаа дроны нислэгт хязгаарлалтаа нэмэгдүүлсэн байна.
mnb.mn
