Монгол, Хятадын сэтгүүлчдийн хамтарсан цахим сурвалжлагын баг өчигдөр өглөө ӨМӨЗО-ны Хангин Хойд хошууны Сань Дао Чяо суурингийн "Жүн Чэн" үнээний фермээр зочиллоо. 

Тосгоны оршин суугчид болон тэргүүлэгч аж ахуйн нэгж хамтран хөрөнгө оруулж энэхүү фермийг байгуулжээ. Иргэд анх удаа өөрсдөө хувьцаагаа эзэмшдэг, өөрсдийн гэсэн фермтэй болсон нь энэ. Тэдний оруулсан хөрөнгө оруулалт хэдийн 200 сая юаньд хүрсэн байна. Фермийн нэгж хувьцаа 10 мянган юань. 

Тосгоны иргэд хөрөнгө оруулалтаа юаниар, эсвэл өөрсдийн газраар тооцож оруулдаг. Өөрсдийн газраар хөрөнгө оруулсан тосгоны 40 оршин суугчийн нийт хөрөнгө оруулалтыг хоёр сая юаниар тооцсон байна. Өнөөдрийг хүртэл хугацаанд нийт 550 акр газрыг иргэд фермд шилжүүлжээ. Мөн 199 иргэн нийт 23 сая юанийн хөрөнгө оруулалт хийж, фермийн хувьцаа эзэмшигч болжээ.

Тэд  жилийн эцэст олгодог ногдол ашгаа төрөл бүрийн хэлбэрээр авч болдог. Мөн тэргүүлэгч хоршооны хувьцаа гэж бий гэлээ. Энэ нь биднийхээр томоохон хувьцаа эзэмшигчид бололтой. Тэдний нэг нь "Жюньфэн" мал аж ахуйн компани юм. Тэд нийт 15 сая юаниар фермийн хувьцаанд хөрөнгө оруулжээ. Томоохон хувьцаа эзэмшигчтэй байх нь хоршооны хувьцаа эзэмшигчдэд бүрэн итгэл төрүүлэх сайн талтай байдаг талаар фермийн ажилчид ярьж байна. 

Тэдгээр том хувьцаа эзэмшигчдийн нэг болох "Или" компани нэг үнээнд 2000 юаниар тооцож бодлогын нөхөн олговор өгдөг гэнэ. Мөн нэг үхэр тутамд 10000 юаниар бодож, нийт 25 сая юанийн бага хүүтэй  зээлийг эргэлтийн хөрөнгө болгож ашиглуулдаг байна.