Ерөнхий сайд Л.Оюун-Эрдэнэ сургууль, цэцэрлэгийн хичээлийн шинэ жилийн үйл ажиллагааг хуульд заасан хугацаанд буюу Есдүгээр сарын 1-нд эхлүүлэх үүргийг холбогдох албан тушаалтнуудад өгсөн билээ.
Гэвч Монгол улсад цар тахлын нөхцөл байдал хүндрэлтэй байгаа тул 2021-2022 оны хичээлийн жил хэзээ эхлэх нь тодорхойгүй болоогүй байна.
Энэ талаар Ерөнхий сайдын Хэвлэлийн төлөөлөгч Ч.Болортуяа Засгийн газрын хуралдааны дараа мэдээлэл өглөө.
Тэрээр "Ерөнхий сайд болон Засгийн газар цар тахлын нөхцөл байдал, дельта вирусийн тархалтаас шалтгаалж, хичээл сургуулийн төлөвлөлтийг хийх байр суурьтай байгаа.
Элсэлтийн ерөнхий шалгалт Наймдугаар сарын 19-22-нд зохион байгуулагдана. Шалгалт нь вакцинжуулалтад хамрагдсан багш, сурагчдын дунд явагдах учир эрсдэл багатай гэж үзэж байна.
Харин вакцинжуулалтад хамрагдаагүй насныхан буюу 6-11 насны хүүхдүүдийг яах вэ гэдэг нь одоогоор шийдэгдээгүй тул нөхцөл байдлыг харж байж хичээл сургалтыг хэзээ эхлүүлэхийг шийднэ" гэлээ.
Өмнөх долоо хоногт Боловсрол, шинжлэх ухааны сайд Л.Энх-Амгалан "2021 оны Есдүгээр сарын 1-нд танхимын сургалтыг эхлүүлэхгүй бол манай улс хичээл сургалтын үйл ажиллагаагаа хоёр жилийн турш хаасан цөөн орны тоонд багтаж байгаа. Хоцрогдол их байгаа тул танхимын хичээл сургалтыг эхлүүлэхээр бэлтгэлээ хангаж байгаа" хэмээн мэдээлж байсан юм.
