Засгийн газрын өнөөдрийн хуралдаанаас Ерөнхий боловсролын сургуулийн 1-5 дугаар ангийн нэг хүүхдэд ногдох үдийн хоолны зардлыг 2021 оны есдүгээр сарын 1-ний өдрөөс 1,500, 6-9 дүгээр ангийн нэг хүүхдэд ногдох үдийн хоолны зардлыг 2022 оны есдүгээр сарын 1-ний өдрөөс 1,800 төгрөг байхаар тус тус тогтоожээ.
Мөн цэцэрлэг, сургуулийн хоол үйлдвэрлэл, үйлчилгээний чанар, хүртээмжид хяналт тавьж, удирдлага арга зүйгээр хангах чиг үүрэг бүхий хоолзүйч мэргэжилтний орон тоог баталж, шийдвэрлэхийг холбогдох сайд нарт даалгасан байна. Түүнчлэн сургууль, цэцэрлэгийн хоол үйлдвэрлэл, үйлчилгээний чанар, аюулгүй байдалд хяналт тавьж, үүсэж болох эрсдэлээс урьдчилан сэргийлж ажиллахыг анхаарууллаа.
2019 онд УИХ "Үдийн цай" хөтөлбөрийг "Үдийн хоол" болгон өргөжүүлэхээс өмнө нэг хүүхдэд ноогдох үдийн цайны зардал 600 төгрөг байсныг 2020 оноос 900 төгрөг болгон нэмэгдүүлсэн байжээ.
