Монгол, Ираны Гадаад харилцааны яам хоорондын зөвлөлдөх уулзалт энэ оны 7 дугаар сарын 4-6-ны өдрүүдэд Улаанбаатар хотноо болов. Зөвлөлдөх уулзалтыг монголын талаас ГХЯ-ны Төрийн нарийн бичгийн дарга Д.Даваасүрэн, ираны талаас Гадаад хэргийн яамны дэд сайд бөгөөд Ази, Далайн орнуудын газрын Ерөнхий захирал Махмуд Фаразандех нар ахалж оролцов.
Төлөөлөгчид Монгол, Ираны найрсаг харилцаа өнө эртний түүхэн улбаатайг тэмдэглэж, харилцаа, хамтын ажиллагааг хөгжүүлэх тодорхой асуудлуудаар санал солилцов. Тухайлбал, Монголоос Иран Улсад гаргаж буй “халал” аргаар боловсруулсан махны экспортыг нэмэгдүүлэх боломжийн талаар ярилцав. Түүнчлэн, Ил Хаант Улсын үеийн түүхийг судлах ажил үр дүнтэй явагдаж, эхний шат нь дуусч, хоёр дахь шатны хамтын ажиллагаа эхэлсэнд сэтгэл ханамжтай байгааг талууд тэмдэглэв.
Гадаад харилцааны сайд Д.Цогтбаатар мөн төлөөлөгчдийг хүлээн авч уулзлаа.
