Өмнөговь аймгийн Ханбогд сумын нутагт орших Оюу толгойн гүний уурхайд өчигдөр осол гарчээ. Энэ талаар Оюу толгой компанийн эх сурвалж "Ийм зүйл болсон нь үнэн. Гүний уурхайд ажилладаг автомашин шатсан. Хөдөлмөр хамгааллын дүрмийн дагуу ийм нөхцөл байдал үүссэн тохиолдолд гал унтраах төхөөрөмжийг асаагаад өөрөө зугтах ёстой байдаг. Аврах баг шуурхай ажиллаж гүний уурхайд байсан ажилтнуудыг дээш гаргасан. Австралиас ослын шалтгаан нөхцөлийг тогтоох бүрэлдэхүүн ирээд ажиллаж байна" гэв.

Ослын шалтгаан тодруулах, хохирлыг тодорхойлохоор Ханбогд сумын Онцгой байдлын алба, Цагдаагийн газартай хамтран ажилласаар байна гэж ОТ мэдээллээ.  Эх сурвалжуудын мэдээлж буйгаар аврах ажиллагаа 11 цаг үргэлжилсэн байна. 

ОТ нь одоогоор баяжмалаа ил уурхайгаас олборлосон хүдрээс боловсруулж байгаа бөгөөд Оюу толгойн ордын нийт баялгийн 80 гаруй хувь нь буюу хамгийн агуулга сайтай хүдэр нь газрын гүнд орших бөгөөд энэ хүдрийн биет нь дэлхийн хамгийн өндөр зэс, алтны агуулга бүхий хүдрийн биетүүдийн нэгд тооцогддог юм.

ОТ-н гүний уурхайн иж бүрэн цогцолборыг блокчлон олборлох орчин үеийн технологи ашиглан барьж байгуулахаар зорьж байгаа билээ.