Тулгар төрийн 2229, Их Монгол Улс байгуулагдсаны 814, Ардын хувьсгалын 99, Ардчилсан хувьсгалын 30 жилийн ой, Үндэсний их баяр наадмын хүчит бөхийн барилдааны шөвгийн 16-д шалгарсан бөхчүүдийн сэргээшийн шинжилгээний хариуг өнөөдөр зарлалаа. 

Үндэсний их баяр наадмын 2003 онд батлагдсан холбогдох хууль, дүрмийн дагуу шөвгийн 16-д үлдсэн бөхчүүдээс допингийн сорьц авдаг болсон. Энэ дагуу шинжилгээ авсан байна. БНСУ-д хийгдсэн шинжилгээний хариу Есдүгээр сарын 8-ны өдөр Үндэсний бөхийн салбар хороонд ирсэн байна. 

Шинжилгээгээр Улсын аварга Н.Батсуурьиас нэг төрлийн хориотой бодис, Улсын харцага Б.Бат-Оршихоос гурван төрлийн хориотой бодис, Улсын арслан Р.Пүрэвдагваас гурван төрлийн хориотой бодис тус тус илэрчээ.

Хариуг журамд заасны дагуу бөхчүүдэд тус бүрчлэн мэдэгдсэн гэлээ. 

Харин бөхчүүд мэдээлэлтэй танилцсаны дараа бөхчүүд "А" сорьцны шинжилгээний хариуг хүлээн зөвшөөрсөн эсэхээ мэдэгддэг ба хүлээн зөвшөөрөөгүй тохиолдолд "В" сорьцын шинжилгээнд ордог байна. 

Гурван бөх шинжилгээний хариуг хүлээн зөвшөөрсөн тул Монголын бөхийн салбар хороо хуралдаж, сэргээш хэрэглэсэн бөхчүүдийн асуудлыг хэлэлцэж цол зэргийг хураах, сэршээг хэрэглэсэн бөхчүүдэд унасан бөхчүүдийн цол чимгийг нөхөж олгох эсэхийг шийддэг. 

Энэ долоо хоногтоо багтан Монголын бөхийн салбар хороо хуралдаж шийдвэрээ Монгол улсын ерөхийлөгчид танилцуулах аж. 

Мэдээллийн дараа сэтгүүлчидийн асуултад хариулав. 

-Улсын аварга Н.Батсуурь идэж, уух зүйлэнд бодис хольсон гэж хардаж буйгаа зарласан. Энэ тохиолдлыг яаж шалган тогтоох вэ?

Монголын үндэсний допингийн эсрэг хорооны ахлах мэргэжилтэн Д.Энхсанаа "Дэлхийн допингийн эсрэг агентлагаас гаргасан Допингийн эсрэг хууль гэж бий. Энэ хуулийн 21.3-т тамирчин хүн идэж уусан болон хэрэглэсэн бүх зүйлийнхээ хариуцлагыг өөрөө хүлээнэ гэж заасан байдаг. Иймд хольсон, хүн хийсэн гэх асуудлыг авч хэлэлцэхгүй. 

Мөн уг хуулийн 2.1-д хориотой бодис болон хориотой бодисын маркер, бодисын солилцооны бүтээгдэхүүн илэрвэл допингийн зөрчил гэж үзнэ. Түүнчлэн уг зөрчлийг санаатайгаар эсвэл санамсаргүйгээр гаргасан эсэхийг заавал тодруулах шаардлагагүй гэсэн байдаг.

-Тамирчдад сургалт, сурталчилгааг хэрхэн танилцуулдаг вэ?

-Дэлхийн допингийн эсрэг агентлагаас жил бүр гаргадаг хориотой жагсаалтыг орчуулан тараадаг. Бөхчүүд допингийн талаар сайн ойлголттой. Сургалт зохион байгуулахад бөхчүүд биеэрээ ирж хамрагдахдаа хойрго байдаг. Тиймээс бөхийн холбоотой хамтран сургалт сурталчилгааг тогтмол зохион байгуулж, мэдээлэл түгээдэг.