Монгол улсын Гадаад харилцааны сайд Н.Энхтайваны урилгаар Япон улсын Гадаад хэргийн сайд Мотэги Тошимицү Монгол Улсад албан ёсоор айлчлах хийх болсон. Энэ талаар өнөөдөр Гадаад харилцааны яамнаас мэдээлэл хийлээ. 

Япон Улсын Гадаад хэргийн сайд Мотэги Тошимицү 2020 оны аравдугаар сарын 9-10-ны өдрүүдэд манай улсад албан ёсны айлчлал хийх юм. 

Айлчлалын уеэр Япон Улсын Гадаад хэргийн сайд Т.Мотэги Монгол Улсын Ерөнхийлөгч Х.Баттулга, Ерөнхий сайд У.Хүрэлсүх нарт бараалхаж, Гадаад харипцааны сайд Н.Энхтайвантай албан ёсны хэлэлцээ хийхээр төлөвлөжээ.

Уулзалт, хэлэлцээний үеэр талууд Монгол, Японы Стратегийн түншлэлийг бататган бэхжүүлэх талаар, дээд, өндөр түвшний яриа хэлэлцээний давтамжийг хадгалах, хоёр талын хамтын ажиллагааг бүхий л салбарт өргөжүүлэн, гүнзгийрүүлэх талаар дэлгэрэнгүй ярилцана. Мөн олон улс, бүс нутгийн харилцан сонирхсон асуудлаар санал солилцоно. 

Ази, номхон далайн орнуудын газрын захирал Э.Сарантогос “Япон улсын Гадаад хэргийн сайд он дараалж манай улсад айлчилж байгаа нь онцлог юм. Мотэги сайд цар тахлаас хойш айлчлалаа цөөрүүлсэн байсан бол наймдугаар сараас гадаад бодлогоо идэвхжүүлж эхэлсэн. 

Энэ удаа Монгол Улсад хийж буй айчлал нь дангаар буюу зөвхөн манай улсад айлчлахаар байгаа. Энэ нь Япон улсын Засгийн газар Монгол Улстай Стратегийн түншлэлээ бэхжүүлэх асуудалд өндөр ач холбогдол өгч байгааг харуулж байна гэж бид харж байгаа" гэлээ.  

Манай улсын хувьд Гадаад улсаас хийж буй өндөр хэмжээний айчлалын уулзалтуудын үеэр ариутгал, халдваргүйтгэлийг бүрэн хангах асуудалд яамны зүгээс өндөр ач холбогдол өгч ажиллаж байгаа бөгөөд энэ чиглэлээр ГХЯ-ны Төрийн нарийн бичгийн даргаар ахлуулсан ажлын хэсэг ажиллаж байгаа аж. 

Мөн айлчлалын дараа УОК-оос тавьж буй шаардлагын дагуу тусгаарлах арга хэмжээ хийгдэнэ гэж мэдээллээ. 

Япон Улсын Гадаад хэргийн сайдын энэ удаагийн айлчлал нь Монгол Улсад хийж буй тав дахь айлчлал юм. Өмнө нь Япон Улсын Гадаад хэргийн сайд С.Уно 1989 онд, Ё.Кавагүчи 2004 онд, К.Окада 2010 онд, Т.Коно 2019 онд тус тус Монгол Улсад айлчилж байжээ.