Ерөнхий сайд асан М.Энхсайханыг өнгөрсөн парламентын үед Монгол улсын сайдаар ажиллаж байхдаа улсад их хэмжээний хохирол учруулсан гэх үндэслэлээр ялласан билээ.
Түүнийг Тавантолгойн гэрээг хорлон сүйтгэх ажиллагаа явуулсан, эрх мэдлээ урвуулан ашигласан гэж буруутгасан байдаг. Хэдийгээр М.Энхсайхан шалгагдаж байх хугацаандаа өөрийгөө гэм буруугүй гэдгээ хэвлэлийнхэнд хэд, хэдэн удаа хэлж байсан ч анхан шатны шүүхээс түүнд 4.6 жилийн хорих ял оноосон юм.
Тодруулбал, Ерөнхий сайд асан М.Энхсайханд холбогдох хэргийн анхан шатны шүүх хурал өнгөрсөн тавдугаар сард болж Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхээс түүнд 4,6 жилийн ял оноож, ялаа эдэлж дууссаных нь дараа нийтийн албанд томилогдох эрхийг дөрвөн жилийн хугацаагаар хасах шийдвэрлэсэн байдаг. Мөн давж заалдах шатны шүүх түүнд оноосон анхан шатны шүүхийн ялыг хэвээр үлдээж шийдвэрлэсэн байдаг.
Тэгвэл Ерөнхий сайд асан М.Энхсайхан дахин гомдол гаргаж, гомдлыг өнөөдөр Улсын Дээд шүүхэд хэлэлцлээ. Шүүх бүрэлдэхүүн М.Энхсайханд оноосон ялаас зургаан сарын хугацааг хасаж, ялыг нь хөнгөлсөн байна.
