Засгийн газраас арваннэгдүгээр сарын 12-ны 06:00 цагаас арваннэгдүгээр сарын 17-ны 06:00 цаг хүртэл Гамшгаас хамгаалах бүх нийтийн бэлэн байдлын зэрэгт шилжүүлэх шийдвэр гаргалаа. 

Шийдвэр танилцуулах үеэр ХӨСҮТ-ийн Тандалт, судалгааны албаны дарга А.Амбасэлмаа дотоодод тараад буй халдварын талаар мэдээллийг өглөө.

Тэрээр "Улс дотроо коронавируст халдварын батлагдсан 4 тохиолдолтой боллоо. Нэг голомтоос 4 тохиолдол батлагдсан. Өөрөөр хэлбэл, манай улс зөөвөрлөгдсөн өвчлөлтэй байсан бол өнөөдөр кластр өвчлөлтэй улс орны тоонд орлоо.

ДЭМБ-ын зөвлөмжийн дагуу коронавируст халдварын ойрын хавьтлыг 24-48 цагийн дотор олж тогтоох ёстой байдаг. Бид одоогоор 73 ойрын хавьтлыг илрүүлээд байна. Ойрын хавьтал гэдэг нь тухайн халдварын лабораториор батлагдсан тохиолдолтой 1.5-2 метрийн дотогш зайд хамгаалах хэрэгсэлгүй, 15 минутаас дээш хугацаанд уулзсан бол ойрын хавьтал гэж тооцдог. 

Тэдгээр 73 хүнийг тусгаарлах байранд тусгаарласан. Мөн илэрсэн халдварын тохиолдол нь үзвэр үйлчилгээний газруудаар явсан болохоор 2,000 гаруй дам хавьтал байна.

Тэдгээр дам хавьтлуудын байршлыг тогтоох үйл ажиллагаа явагдаж байна. Байршлыг нь тогтоосны дараа бид арга хэмжээгээ авна. Түүнтэй хамт үзвэр үзсэн 200 гаруй хүн ХӨСҮТ-д шинжилгээ өгсөн. Үнэнийг хэлэхэд энэ бүх ойрын хавьтлын шинжилгээний хариу бүгд зүгээр гарна гэж хэлэхэд хэцүү. Магадгүй цаашид батлагдсан тохиолдол нэмэгдвэл авах арга хэмжээ цааш үргэлжилнэ.

Халдвар хамгааллын авч буй арга хэмжээ нь ДЭМБ-ын зөвлөмж гэдгийг иргэд маань ойлгож бидэнтэй хамтран ажиллаж, цар тахалтай тэмцэхийг хүсэж байна. Энэ хугацаанд хорио цээрийн дэглэмийг мөрдөж, аль болох гадуур явахгүй байх, явах бол амны хаалт тогтмол зүүх, гараа ариутгах, олон хүн бөөгнөрсөн газраар явахгүй байхыг хүсэж байна" гэлээ.