Эрүүл мэндийн яамнаас коронавируст халдварын нөхцөл байдлын талаар мэдээлэл хийлээ. 

ХӨСҮТ-ийн Тандалт, судалгааны албаны дарга А.Амбасэлмаа "Арваннэгдүгээр сарын 12-нд нийт 1,030 хүний сорьцод шинжилгээ хийхэд 6 хүний шинжилгээнд коронавирус илэрлээ. Нийт хийгдсэн шинжилгээний 501 нь тусгаарлалтад байсан хүмүүсийн давтан шинжилгээ бөгөөд тэдгээрт халдвар илрээгүй.

ХӨСҮТ-ийн эмч ажилчдыг шинжилгээнд хамруулахад хоёр халдвар илэрлээ.

Тээврийн жолоочийн буюу Улаанбаатар хотод голомтлон гарсан халдварт батлагдсан тохиолдол зургаа байгаа. Тандалт судалгаа үргэлжилж байна. Ойрын болон дам хавьтал нийт 3,000 орчим хүнийг хяналтандаа аваад шинжилгээ тандалт хийж байгаа.

Сэлэнгэ аймагт 12-ноос 13-нд шилжих шөнө тус аймгийн оршин суугч гурван хүний шинжилгээнд коронавирус илэрсэн. Өнөөдөр ХӨСҮТ мэргэжлийн нэг багаа Сэлэнгэ аймаг руу илгээлээ.

Ингээд Монгол улсад нийт батлагдсан тохиолдол 412 боллоо. Үүнээс 317 нь эдгэрсэн. ХӨСҮТ-д одоо 175 хүн ажиглалт тандалтад байгаа" гэв.

Тэрээр үргэлжлүүлэн сэтгүүлчдийн асуултад хариуллаа. 

-Оношлуурын чанарт эргэлзэх хүн байна. Баталгаатай юу? 

-Бид 21 хоног тусгаарлан, гурван удаагийн шинжилгээ сөрөг гарсан учир 11-р сарын 6-нд тусгаарлалтаас гарсан. 9-ний өдөр тээврийн жолоочоос вирус илэрсэн. ДЭМБ-аас мэдээлснээр халдварын нууц үе 14 хоног, зарим судалгаагаар 21-27 хоног байж болно гэж мэдээлсэн. Энэ хүний хавьтал 3000 орчим хүний нэр хаягийг авч, хяналтад оруулаад байна.

-Оношлуур хангалттай байгаа юу? 

-Хангалттай байгаа. Өнөөдөр Сөүлийн онгоцоор оношлуур ирнэ.

-Сэлэнгэ аймагт илэрсэн гурван тохиолдол тээврийн жолоочтой хамааралгүй гэж УОК-оос өчигдөр өгсөн. Үүнийг тодруулж өгнө үү? 

-Сэлэнгийн гурван хүн одоогийн байдлаар тээврийн жолоочтой холбогдолгүй байна. Тандалт судалгааг үргэлжлүүлэн хийж байна. холбоотой байхыг үгүйсгэхгүй. Сэлэнгэд батлагдсан 74 настай эмэгтэй гэртээ гурвуулаа амьдардаг, гадуур гардаггүй хүн. Бэр нь гадуур явж байгаад халдвар авсан байхыг үгүйсгэхгүй.