Дөнгөж сая Сүхбаатарын талбай дээр 1987 онд төрсөн 34 настай залуу өөрийгөө шатааж амь насаа алдлаа. Болсон үйл явдлыг Төрийн ордны өмнө сурвалжлага бэлтгэж байсан сэтгүүлч шууд мэдээллээ. 

Өнөөдөр Монгол Улсын Ерөнхийлөгчийн зарлигаар төрийн дээд одон шагнал гардуулах ёслол болж, шагналтнуудыг тосч авахаар цуглаад байсан олны дунд дээрх явдал болжээ. Энэ үеэр зарим телевиз, сайтууд шагналыг үйл ажиллагааг шууд мэдээлэл дамжуулж байсан юм. 

Энэ үеэр тэдний ард нэгэн иргэн өөр лүүгээ бензин асган гал асаасан байна. Түүнийг шатаж эхлэх үед ойрхон байсан хүмүүс гадуур хувцасаа тайлж галыг унтрааж, түргэн тусламж дуудсан боловч тусламж ирэхээс өмнө залуу нас баржээ. 

Сануулахад, өнөөдрийн энэ эмгэнэлт явдал болохоос хэдхэн хоногийн өмнө УИХ-ын гишүүн С.Ганбаатар Оюутолгойн гэрээг эсэргүүцэн өлсгөлөн зарлаж, шаардлагатай бол өөрийгөө шатаана хэмээн мэдэгдэж байсан. Гэвч улстөрчид хэзээ ч хэн нэгний төлөө амиа золиослохгүй нь тодорхой. Золиосонд гэм зэмгүй жирийн иргэд амь насаа үйж байна.

Цар тахлын улмаас нийгмийн амьдрал хүндэрч, ард иргэд бухимдалтай байгаа энэ үед УИХ-ын гишүүн, төрийн өндөр албан тушаалтан хүн нийгмийг бухимдуулж, үймээн самуун, хүчирхийлэлд уруу татсан мэдэгдэл хийсэн нь улстөрчийн ч, нийгмийн зүтгэлтний хувьд ч байж боломгүй, ёс суртахуунгүй үйлдэл мөн.

Тиймээс ийм үйлдэлд бусдыг турхирсаных нь төлөө С.Ганбаатараас эрүүгийн ял асуудаггүй юм гэхэд улстөрийн болон ёс суртахууны хариуцлага нэхэх ёстой.

Б.ЗАЯА