ЭМЯ-наас коронавируст халдварын нөхцөл байдлын талаар мэдээлэл өглөө.

ХӨСҮТ-ийн дэд захирал Э.Тэмүүлэн "Өчигдөр нийт 19318 шинжилгээ хийж, 169 тохиолдол бүртгэгдэж 3833 боллоо. Шинээр халдвар авсан иргэд бүгд нийслэлээс бүртгэгдсэн ба нийт тохиолдлын тоо 2958 болж байна.

Сүүлийн 24 цагт 48 хүн эдгэрч гарсан ба нийтдээ 2955 эдгэрч халдвар авсан иргэдийн 77 хувийг эзэлж байна.  

Одоогоор 13 хүний халдварын эх уурхайг тодорхойлох тандалт үргэлжилж байна. Одоогоор хөнгөн 811, хүндэвтэр 42, хүнд 6, маш хүнд 2 хүн эмчлүүлж байна. 

Халдварын тохиолдол нэлээд эрчимтэй нэмэгдэж байгаа тул ЭМЯ-ны зүгээс 28 хоногийн хөл хорио тогтоох санал хүргүүлсэн. Хэрэв хөл хорио тогтоох шийдвэр гаргах боломжгүй бол караоке, бар, рестораны үйл ажиллагааг 21 хоног түр зогсоох. Мөн нэг байгууллагад 10 дээшгүй ажилтан байлгах, эсвэл богино цагаар ажиллуулах гэх мэт санал гаргасан. УОК ямар ч шийдвэр гаргасан бай иргэдийн үүрэг хариуцлага маш өндөр байна. Тиймээс би салбараа төлөөлж, хувийн дэглэм сайтар баримтлах, маскаа давхар зүүх, хүн хоорондын зай барих, орчны агаар сэлгэх үйлдлүүдээ маш сайн хийж байж вакцинжуулалтын үр нөлөөг үзнэ. Ард иргэдийн дунд вакцины нэгдүгээр тунг хийсний дараа дархлаатай болж байгаа мэт ойлголт төрөөд байгаа. Гэтэл вакцин хийлгээд дор хаяж 14 хоносны дараа бүрэн дархлаа тогтож, КОВИД-19 халдвар авах эрсдэл буурна. 

Нэг батлагдсан тохиолдлын ойрын хавьтал, дам хавьтал маш их нэмэгдэж байгаа. Үүнтэй холбоотойгоор мэргэжлийн байгууллагын хүний нөөц шавхагдаж, олон цагаар ажиллахаас өөр аргагүй байна. Тиймээс хэрэв та батлагдсан бол таныг эмнэлэгт хүргэх үйл явц бага зэрэг удаашрахыг сануулж байна" гэлээ.