ХӨСҮТ-өөс мэдээлснээр сүүлийн 24 цагт 17044 хүний сорьцод шинжилгээ хийхэд 158 хүнээс коронавирус илэрчээ. Эдгээрийн 149 нь Улаанбаатар хотод, Хөвсгөл аймагт 7, Төв аймагт 2 тохиолдол бүртгэгджээ. 21 хүний халдварын эх сурвалжийг тогтоохоор тандалт судалгаа хийж байгаа бөгөөд бусад өмнөх батлагдсан тохиолдлын хавьтлууд байна. Улсын хэмжээнд нийт халдварын батлагдсан тохиолдол 4498 болжээ.
Мөн өнгөрсөн 24 цагийн хугацаанд 81 хүн эдгэрч, эмнэлгээс гарсан байна. Ингэснээр нийт эдгэрсэн хүний тоо 3212 болжээ. Энэ нь нийт халдварын 71 хувийг эзэлж байна. Коронавирусийн халдварын улмаас эмчлэгдэж байсан 89 настай нэг хүн нас барсан байна.
А.Амбасэлмаа: Вакцинжуулалт эхэлсэнтэй холбоотойгоор иргэдийн дунд тайвширах хандлага ажиглагдаж байна
Өнөөдрийн Эрүүл мэндийн яамны ээлжит мэдээллийн цагт доктор А.Амбасэлмаа оролцлоо. А.Амбасэлмаа доктор нийслэлийн хэд хэдэн цэгт халдварын эрсдэл маш өндөр байгааг онцлов.
Эрсдэл өндөртэй цэгт нийслэлийн хамгийн олон хүн амтай хороо буюу БЗД-ийн 26 дугаар хороо багтаж байна. Тус хорооны нутаг дэвсгэрт сүүлийн 14 хоногийн хугацаанд нийт 36 байранд 54 тохиолдол бүртгэгдсэн бөгөөд ойрын хавьтлын 200-гаас давжээ. Батлагдсан нэг тохиолдлын ард 2-3 хүн халдвар авсан байх магадлалтай бөгөөд эрсдэлээс сэргийлж, халдварыг бууруулахын тулд энэ сарын 17-ноос эхлэн тухайн нутаг дэвсгэрт богино хугацааны хөл хороог тогтоосон байна.
А.Амбасэлмаа:
-Халдвараас сэргийлэх ажиллагаанд тус хорооны иргэд идэвхтэй оролцож байна. Өчигдрийн байдлаар гэхэд нийт шинжилгээнд хамрагдвал зохих хүн амын 60 гаруй хувь нь шинжилгээгээ өгсөн. Өнөөдөр үлдсэн 40 хувь нь шинжилгээнд хамрагдвал бүх хүн шинжилгээгээ өгч дуусна гэсэн үг.
Үүний зэрэгцээ БЗД-ийн 26 дугаар хорооны зарим байр, гудамжинд халдваргүйжүүлэлт хийж, 50-65 насны хүмүүс, хөгжлийн бэрхшээлтэй иргэдийг вакцинжуулах үйл ажиллагааг зохион байгуулна" гэв.
Хан-Уул дүүргийн 15 дугаар хорооны нутаг дэвсгэрт өргөжүүлсэн тандалт хийж байна
Мөн өнөөдрөөс эхлэн Хан-Уул дүүргийн 15 дугаар хорооны нутаг дэвсгэрт өргөжүүлсэн тандалтын ажил эхлүүлсэн байна. Энэ нь халдвартай хүнийг илрүүлэх, хавьтлыг тусгаарлах, тухайн нутагт халдварыг бууруулах зорилготой аж. Уг арга хэмжээг цаашид аль ч хороонд зохион байгуулах боломжтой тул эрүүл мэндийн байгууллагаас хэрэгжүүлж буй арга хэмжээг дэмжиж, хамтарч ажиллахыг иргэдээсээ хүслээ.
Мөн манай иргэдийн хувьд вакцинжуулалт эхэлсэнтэй холбоотойгоор нэлээд тайвширсан байдал ажиглагдаж байгааг тэр сануулав. Дэлхий даяараа вакцинжуулалттай зэрэгцэн нийгмийн эрүүл мэндийн бусад арга хэмжээ болох амны хаалт зүүх, хүн хоорондын зай барихыг зөвлөж байгаа. Энэ бүх арга хэмжээг хослуулан хэрэгжүүлж байж бид цар тахлын ард гарна. Ялангуяа вакцины эхний тунг хийлгэсэн хүн өөрийгөө хамгаалах тал дээр онцгой анхаарах ёстой гэдгийг анхааруулсан юм.
