Монгол улсын иргэн Г.Мөнхжаргал хугацаат цэргийн алба хаагч зүй бусаар зодуулж амиа алдсаныг эсэргүүцэж, төв талбайд хувцсаа тайлан, өөрийн Фэйсбүүкээр хуудсаараа дамжуулан үзэл бодлоо илэрхийлжээ.

Тэрээр "Өчигдөрхөн цэрэг амь насаа алдсантай холбогдуулан би энд лайв хийж бүтэн цаг цээж нүцгэн зогсоно. Хүний үзэл бодлыг сонсох хэрэгтэй. Хүний амийг мөнгөөр үнэлдэг яасан их мөнгөтэй юм. Хүн 18, 19, 20 жил нүдний цөгцгий мэт хайрлаж өсгөсөн хүүгээ цэрэгт явуулчаад цогцос хүлээж авах зөв үү?! Өмнө нь Засгийн газар бүтнээрээ огцорч болоод байсан одоо яасан болоод сайд нь ч гарч ирэхгүй байгаа юм.

Би 11 настай хүүтэйгээ амьдардаг. Хүү маань надаас одоо та намайг цэрэгт явуулах хэвээрээ юу гэж асууж байна. 

Би хүүгээ цэрэгт явуулна гэхээс эмээж байна. Цэрэгт хүнийг үхтэл зодчихоод эцэг эхэд нь таван жилийн цалингийн мөнгө өгнө гэж ярьж болохгүй биз дээ. Төр засаг нь чив чимээгүй байна. Үүнийг би эсэргүүцэж байна.

Дайнд яваад амиа алдсан бол хамаагүй. Эх орон, хайртай хүмүүсийнхээ төлөө амиа зольдог. Нэг жилийн цэрэг ийм яргатай байж болох юм уу? Ямар аймшигтай юм бэ? Ийм зүйл болчхоод байхад яагаад хэн ч дуугарахгүй байгаа юм?!" гэлээ.

Тэрээр төв талбай дээр цээж нүцгэн бүтэн цаг зогсож эсэргүүцэлээ илэрхийлсэн юм.