Сүхбаатарын талбайн урд хэсэгт орших Хонхтой цэцэрлэгт хүрээлэнг тохижуулж, олон нийтийн цэцэрлэгт хүрээлэн болгон хөгжмийн аялгуутай усан оргилуур, дугуйн талбайтай, хоёр нийтийн бие засах газар байгуулж тохижуулахаар болсон.
Мөн нийслэлийн Засаг даргын захирамжийн дагуу эзэмшиж ашиглаж буй газраа зориулалтын дагуу ашиглаагүй газруудын судалгааг холбогдох мэргэжлийн байгууллагынхан гаргаж байгаа бөгөөд газруудыг чөлөөлж олон нийтийн эзэмшлийн цэцэрлэгт хүрээлэн байгуулах аж.
Тодруулбал;
- Хан-Уул дүүргийн 15-р хороо, Богдын цэцэрлэгт хүрээлэнд олгогдсон газрын зөвшөөрлийг цуцалж, Богд хааны нэрэмжит цэцэрлэгт хүрээлэн байгуулна.
- Баянзүрх дүүргийн 4-р хороо, Хил хамгаалах ерөнхий газрын баруун талд байрлах 8 га газар буюу хуучнаар Хоккейн талбай байсан газрыг чөлөөлж, иж бүрэн спортын талбай, цэцэрлэгт хүрээлэнг байгуулах ажил хийгдэж байна.
- Чингэлтэй дүүргийн 4-р хороо "Дипломат-95" айлын орон сууцны хойно байрлах 2,000 м.кв талбайг чөлөөлж, цэцэрлэгт хүрээлэн байгуулах ажлыг 2019 онд хийж гүйцэтгэлээ.
- Сонгинохайрхан дүүргийн 22-р хороо, Тахилт орчимд 4 га газар эзэмших эрхийг хүчингүй болгож, цэцэрлэгт хүрээлэн байгуулах ажил хийгдэж байгаа гэж Улаанбаатар хотын захирагчийн ажлын албаны Хотын тохижилт, цэцэрлэгжүүлэлтийн хэлтсийн дарга М.Гансэлэм танилцуулав.
М.Гансэлэм: "Чөлөөлөгдсөн газруудад олон нийтэд зориулсан цэцэрлэгт хүрээлэн, ногоон байгууламж байгуулна" гэлээ.
Дашрамд, хонхтой цэцэрлэгт хүрээлэнгийн тохижилтын ажлыг ирэх зургаадугаар сарын 5 гэхэд дуусгах аж.
