Улсын онцгой комиссын Шуурхай штабаас ээлжит мэдээллээ хүргэлээ.

Энэ үеэр ОБЕГ-ын дарга Т.Бадрал: "Нөхцөл байдал нэлээд хүндэрч байна. Иймээс асуудлыг хамгийн муу хувилбараар тооцоолж, олон хүн халдварт өвчнөөр өвдсөн тохиолдолд бид хэрхэн ажиллах тухай дасгал сургуулилалт хийх цаг нь болсон гэж үзэн Ерөнхий сайдаас өгсөн үүрэг чиглэлийн дагуу гамшгаас хамгаалах сургалтын бэлтгэлийг хангахаар боллоо.

Гэхдээ сургуулилалтыг нийслэлд биш Сэлэнгэ, Дархан-Уул аймаг хийх нь зөв гэсэн санал гарсан ч бид урьдчилсан байдлаар Улаанбаатар хотод хийнэ гэж үзэж байна.

Гамшгаас сэргийлэх сургуулилалтыг энэ дөрөвдүгээр сард хийх талаар өнгөрсөн жилээс төлөвлөж байсан ч халдварт өвчинтэй давхцаж таарлаа. Тиймээс сургуулилалтыг эрүүл мэндийн чиглэлээр явуулж, хамгийн муу тохиолдол үүсэхэд хэрхэн ажиллах болоод цаашид хийж хэрэгжүүлэх ажлаа тодорхойлж, хөрөнгө мөнгөө тооцоолно.

Тухайлбал, Нийслэлийн нэгдсэн эмнэлгүүд, өвчин судлалын төвүүд бүгд байна.

Онцгой байдлын ерөнхий газар, Батлан хамгааллын яам өнгөрсөн арваннэгдүгээр сард Бүгд Найрамдах Польш Улсаас европ стандартын хээрийн эмнэлгүүдийг оруулж ирсэн.

Тухайн эмнэлгүүд хүйтний улиралд орж ирсэн учраас туршиж амжаагүй байгаа" гэсэн юм.