Өнгөрөгч долоо хоногт буюу энэ сарын 23-ны орой ШШГЕГ-ын харьяа хорих 461-р ангид цагдан хоригдоод байсан гавьяат хуульч Л.Бямбаа хорих байранд амиа алдсан эмгэнэлт хэрэг гарсан. Түүнийг авлига, албан тушаалын хэргээр АТГ-т шалгаж байсан билээ.

Уг хэрэгтэй холбоотойгоор ШШГЕГ-ын харьяа 461-р ангийн дарга, Харуул хамгаалалт хариуцсан дарга, ерөнхий жижүүр, ээлжийн дарга, харуул хамгаалалтын ажилтнуудыг ажлын байрны хариуцлага алдсан гэх үндэслэлээр үүрэгт ажлаас нь чөлөөлжээ.

ШШГЕГ-ын дарга Ц.Амгаланбаяр "ШШГЕГ-ын даргын зөвлөлийн хурлаар тухайн үед үүрэг гүйцэтгэж байсан алба хаагчид буюу давхрын харуул хамгаалалтын ажилтан, дүрс бичлэгийн ажилтнууд, ерөнхий эргүүл, ээлжийн дарга ажлын байран дээр хариуцлага алдсан, сонор сэрэмж алдсан, хяналтаа бүрэн дүүрэн тавиагүй зэрэг байдал тогтоогдсон тул ийнхүү хариуцлага тооцохоор болсон" гэлээ. 

Тэрбээр үргэлжлүүлэн 461-р ангийн хувьд ачаалал ихтэй, хоногийн 24 цагийн турш ачаалалтай ажилладаг гэдгийг тодотгосон юм. Мөн хэргийн мөрдөн байцаалт үргэлжилж байгаа тул үүнээс дэлгэрэнгүй мэдээлэл өгөх боломжгүй, ямар хариуцлага алдсан үндэслэлээр энэхүү хариуцлагыг тооцож байгаагаа дэлгэрэнгүй тайлбарласангүй.