Явган зорчигчийн хөдөлгөөнд саад учруулж байгаа зөрчлийг арилгах ажлыг нийслэлийн Газар зохион байгуулалтын албанаас зохион байгуулж байна. Өнгөрсөн намар эхлүүлсэн аяны хүрээнд, иргэдийн саналд үндэслэн явган хүний зам хаасан 50 хаалт, хашаа, өргөтгөл, шат зэрэг объектуудыг чөлөөлөөд байгаа билээ.

Тэгвэл уг арга хэмжээг өнөөдрөөс дахин эхлүүлж, Чингэлтэй дүүргийн 1,2,3-р хороонд нийт ес, Сонгинохайрхан дүүргийн 14, 15, 16 дугаар хороонд нийт таван байршилд газрын зөрчил арилгах, явган хүний зам талбай, орц гарцыг чөлөөлөх ажлыг хийж эхэлжээ.

Уг арга хэмжээний нэгдсэн судалгаагаар эхний ээлжид Баянгол дүүрэгт 10, Баянзүрх дүүрэгт 3, Сүхбаатар дүүрэгт 7, Сонгинохайрхан дүүрэгт 4, Хан-Уул дүүрэгт 1, Чингэлтэй дүүрэгт 4 нийт 29 байршилд явган хүний зам гаргахаар төлөвлөөд байгаа юм.