Бүртгэсэн ослын улмаас нийслэлд 23 хүн бэртэж, 2 хүний амь хохирчээ. Орон нутагт ноцтой зам тээврийн ослын улмаас хоёр хүний амь хохирсон байна.
Ноцтой ослоос дурьдвал, энэ сарын 22-ны 15.00 цагийн орчимд Төв аймгийн Жаргалант сумын гуравдугаар багийн нутаг “Агьтын Хөндий” гэх газар засмал замд "Toyota Prius" загварын суудлын автомаши ижил загварын автомашинтай мөргөлдөж, зорчигч 44 настай эмэгтэйн амь хохирсон байна. Буруутай жолооч согтуугаар тээврийн хэрэгсэл жолоодож байжээ. Мөн энэ сарын 22-нд Баянзүрх дүүргийн 12 дугаар хорооны нутагт "Honda Insight" загварын тээврийн хэрэгсэл онхолдож, жолооч 33 настай эрэгтэй амь хохирч, 37 настай эрэгтэй бэртсэн.
Замын цагдаа нар эдгээр өдөр согтуугаар жолоо барьсан 56 жолоочийг илрүүлж, хуулийн хариуцлага оноосон байна.
Амралтын өдөр зам тээврийн осолд өртсөн 7 хүүхдийн 3 нь явган зорчигч, 3 нь тээврийн хэрэгсэлд зорчигч, 1 нь унадаг дугайтайгааар хөдөлгөөнд оролцож байсан байна. Түүнчлэн бага насны хүүхдийг зориулалтын суудалд тээвэрлээгүй бөгөөд согтуугаар жолоо барьсан жолоочоос болж 3 хүүхэд гэмтэсэн байна.
Иймд гэр бүл, хайртай бүхэн таны гарт байгааг санаж, замын хөдөлгөөний дүрмээ баримтлан, хөдөлгөөнд соёлтой оролцохыг Тээврийн цагдаагийн албанаас уриалж байна.
